अब वर्ल्डलिङ्ककै वेबसाइटबाट नयाँ इन्टरनेट खरिद गर्न मिल्ने, ग्राहकलाई टिभी जित्ने अवसर
फागुन २९, २०७९ १५:२३
काठमाडौं । इन्टरनेट सेवाप्रदायक कम्पनी वर्ल्डलिङ्कले वेबसाइटबाटै आफ्नो इन्टरनेट जडान गर्न चाहने ग्राहकका लागि सेवा दिने भएकाे छ । यसका लागि कम्पनीले वेबसाइटमा नयाँ इन्टरफेस थपेकाे छ । जसअन्तर्गत वर्ल्डलिङ्कको वेबसाइटबाट इन्टरनेट प्याकेजको फारम भर्न, शुल्क तिर्न र जडान हुने मिति थाहा पाउन सकिन्छ ।
यस्ताे सेवा नेपालमै पहिलो पटक ल्याएको कम्पनीको दाबी छ । कम्पनीका अनुसार वेबसाइटबाट विभिन्न प्याकेजका नयाँ इन्टरनेट जडान गर्न सकिन्छ । यसअघि नयाँ इन्टरनेट जडानका लागि वेबसाइटमा भएको फारम भरी आवेदन दिनुपर्थ्याे ।
आवेदन दिएपछि कम्पनीले ग्राहक पुष्टि गर्न सम्पर्क गर्थ्यो । त्यसपछि केही प्रक्रिया पुर्याएर इन्टरनेट जडानको काम सुरु हुन्थ्यो । यो लामो प्रक्रियालाई कम गर्न कम्पनीले नयाँ सुविधा सहितको वेबसाइट तयार पारेको जनाएको छ ।
कम्पनीले वेबसाइटबाटै नयाँ इन्टरनेट जडान गर्ने ग्राहकका लागि विभिन्न अफर पनि ल्याएको छ । यसअन्तर्गत ग्राहकले हरेक हप्तामा सम्पूर्ण इन्टरनेट शुल्क क्याशब्याक पाउन सक्नेछन् । त्यस्तै मासिक स्मार्ट टिभी जित्नसक्ने कम्पनीले जनाएकाे छ ।
नयाँ इन्टरनेट जडानका लागि आवेदन दिने तरिका ?
- सबैभन्दा पहिले यहाँ क्लिक गरेर वर्ल्डलिङ्ककाे वेबसाइटमा जानुहोस् ।
- त्यसपछि आफूलाई उपयुक्त हुने प्लान छान्नुहोस् ।
- यति गरेपछि तल रहेको 'बाइ प्लान ' (Buy Plan) अप्सनमा क्लिक गर्नुहोस् ।
- अनि आफ्नो गुगल अकाउन्टबाट वा नाम, ईमेल र फोन नम्बर राखेर 'रजिस्टर' अप्सनमा क्लिक गर्नुहोस् ।
यति गरेपछि वर्ल्डलिङ्कको अर्डर गर्ने पेज खुल्छ । अनि तपाईँले कम्पनीका लागि नयाँ इन्टरनेट जडान गर्न लाग्नुभएको वा व्यक्तिगत प्रयोजनका लागि प्रयोग गर्ने अप्सन छान्नुहोस् । यति गरेपछि बिलिङ एड्रेसमा आफू बस्ने ठाउँको नाम राख्नुहोस् ।
- त्यसपछि इन्स्टलेसन इन्फरमेसनको सेक्सनमा सबैभन्दा माथि आफ्नो नजिकको ब्रान्च छान्नुहोस् ।
- अनि, त्यसभन्दा तल रहेको 'इन्स्टलेसन डेट'को अप्सनमा आफूलाई अनुकूल हुने मिति छान्नुहोस् ।
- त्यसभन्दा तल, कति बजेदेखि कति बजेसम्मको समय राख्ने हो त्यो छान्नुहोस् ।
- इन्स्टलेसन एड्रेसको अप्सनमा आफ्नो ठाउँको नाम राख्नुहोस् ।
- सम्भव भए 'गुगल म्याप यूआरएल'मा आफ्नो घरको गुगल म्याप लिङ्क राख्नुहोस् ।
- अनि 'प्रोसिड टु पेमेन्ट' अप्सनमा क्लिक गर्नुहोस् ।
- भुक्तानी गर्नका लागि खल्ती वा ईसेवामध्ये एउटा अप्सन छान्नुहोस् ।
- अनि भुक्तानी गर्नुहोस् । यति गरेपछि तपाईँले भनेको मितिमा तपाईँको घरमा इन्टरनेट जडान हुन्छ ।
भुक्तानी गर्दा खल्तीको अप्सन रोज्नुभयो भने वार्षिक भुक्तानीमा हजार रुपैयाँ क्याशब्याक, छ वा तीन महिनाको भुक्तानीमा पाँच सय रुपैयाँ छुट पाउन सकिने कम्पनीले जनाएकाे छ ।
पछिल्लो अध्यावधिक: फागुन २९, २०७९ १६:१
