काठमाडौंमा ५ दिने आईटी कार्यशाला आयोजना गर्दै एनपी नग

काठमाडौं । नेपाल नेटवर्क अपरेटर्स ग्रुप (एनपीनग) ले पाँच दिने कार्यशाला तथा सम्मेलन आयोजना गर्ने भएको छ । यही असार  ३  देखि ८ सम्म सञ्चालन हुने कार्यक्रम काठमाडौंको होटल रोयल सिङ्घी र होटल एलफ्टमा हुने भएको हो ।

एनपी नग- एट (npNOG-8) नाम दिइएकाे कार्यक्रममा पाँच दिने कार्यशाला र एक दिने सम्मेलन आयोजना हुनेछ ।

होटल रोयल सिङ्घीमा हुने कार्यशालामा नेटवर्किङ एवं सूचना तथा सञ्चार प्रविधिको क्षेत्रमा संलग्न व्यावसायिक विज्ञहरूबाट दुई ओटा विषयगत क्षेत्रमा तालिम सञ्चालन गरिने आयोजकले जनाएको छ ।

इन्टरनेट एक्सचेञ्ज नेपाल (एनपीआईएक्स) तथा नेपाल नेटवर्क अपरेटर्स ग्रुप (एनपीनग) ले उक्त कार्यशाला संयुक्त रुपमा सञ्चालन गर्नेछन्, जसमा नेटवर्क सेक्युरिटी, अप्टिकल फाइबर नेटवर्क एन्ड इन्फ्रास्ट्रक्चर र बीजीपी एन्ड आईपीभीसिक्स डिप्लोयमेन्ट जस्ता विषय रहेका छन् ।

कार्यक्रमको अन्तिम दिन होटल एलफ्टमा सम्मेलन आयोजना हुनेछ । सम्मेलनमा आईटी सम्बन्धी विज्ञहरूले आ-आफ्ना कार्यपत्र प्रस्तुत गर्नेछन् । उक्त तालिम कार्यक्रममा सूचना सञ्चार प्रविधिको क्षेत्रमा कार्यरत करिब १५० जनाभन्दा बढी सहभागी हुने अपेक्षा गरिएको छ ।

एनपीआईएक्सका प्रबन्ध निर्देशक रुपेशभक्त श्रेष्ठका अनुसार यो कार्यक्रमले सूचना तथा सञ्चार प्रविधि क्षेत्रमा लागेका समुदायको पारस्परिक ज्ञान आदान प्रदानमा सहयोग पुग्नेछ ।

“कार्यशालामा व्यावसायिक विज्ञहरूले स्वयंसेवाको रूपमा तालिम दिनेछन्,” कार्यक्रमको बारेमा जानकारी दिँदै श्रेष्ठले भने । एनपी नगका अध्यक्ष समित जनले वर्षको दुई ओटा कार्यक्रम गर्ने गरेको बताए । “हामीले एउटा काठमाडौंमा र अर्को काठमाडौं बाहिर आयोजना गर्ने गरेका छौं,” उनले भने ।

जनले देशको लागि सक्षम व्यावसायिक प्राविधिक जनशक्ति तयार पार्ने कार्यमा एनपी नगको भूमिका सधैं उच्च रहने प्रतिबद्धता जनाए ।

कार्यक्रममा सहभागी हुन इच्छुक व्यक्तिले यहाँ क्लिक गरी रजिस्ट्रेसन गर्न सक्नेछन् । कार्यशाला र सम्मेलन दुवैमा सहभागिताका लागि रजिस्ट्रेसन शुल्क २० हजार रुपैयाँ (विदेशीका लागि २०० अमेरिकी डलर) निर्धारण गरिएको छ ।

त्यस्तै कार्यशालाका लागि मात्र १७ हजार रुपैयाँ (विदेशीका लागि १५० अमेरिकी डलर) र सम्मेलनका लागि मात्र पाँच हजार रुपैयाँ (विदेशीका लागि ५० अमेरिकी डलर) रजिस्ट्रेसन शुल्क तिर्नुपर्नेछ ।

पछिल्लो अध्यावधिक: जेठ २६, २०८० १४:१६

टिप्पणीहरू