आज राति टेलिकमको रिचार्ज गर्न नमिल्ने, प्याकेज पनि त्यस अगावै लिनुपर्ने
असार २५, २०८१ ११:४८
काठमाडौं । आज राति नेपाल टेलिकमको रिचार्ज गर्न नमिल्ने भएको छ । कम्पनीले आफ्नो बिलिङ प्रणाली स्तरोन्नति परीक्षण कार्य गर्न भन्दै यस बारे सूचना जारी गरेको हो ।
यसबाट आज २५ असारको राति ११ बजेदेखि भोलि बिहान ६ बजेसम्म कम्पनीको सेवा प्रभावित हुने बताइएको छ । "उक्त अवधिमा ब्यालेन्स रिचार्ज, प्याकेज खरिद तथ क्वेरी सेवाहरू केही समयका लागि प्रभावित हुन सक्ने हुँदा सो समयभन्दा अगाडि नै आवश्यक ब्यालेन्स रिचार्ज तथा प्याकेज खरिद गर्न अनुरोध छ," कम्पनीले जारी गरेको सूचनामा भनिएको छ ।
उक्त समयमा मोबाइल भोइस, डेटा, एसएमएस तथा एफटीटीएच भोइस, डेटा, आईपीटिभी आदि सेवाहरू भने यथावत् रूपमा सञ्चालन हुने छन् । यसबाट ग्राहक वर्गमा पर्न जाने असुविधा प्रति कम्पनीले क्षमायाचना समेत गरेको छ ।
पछिल्लो अध्यावधिक: असार २५, २०८१ ११:४८
