एनपीएल उद्घाटन खेलका सम्पूर्ण टिकेट 'सोल्ड आउट'

काठमाडौं । नेपाल प्रिमियर लिग (एनपीएल)को उद्घाटन खेलका सम्पूर्ण टिकेट सोल्ड आउट भएका छन् । प्रतियोगिताको आधिकारिक अनलाइन टिकेट पार्टनर खल्तीले टिकेट लाइभ गरेको तीन दिनमै सम्पूर्ण टिकेट बिक्री भएको हो । 

डिजिटल वालेट खल्तीले सोमबार मात्र एनपीएलका टिकेट आफ्नो डिजिटल वालेटमा लाइभ गरेको थियो । त्यसको एकदिनमै सम्पूर्ण भीआईपी टिकेट बिक्री भएकोमा अहिले सामान्य टिकट पनि सबै बिक्री भइसकेका छन् ।

उद्दघाटन खेलमा भीआईपी टिकटको ७०० रुपैयाँ र सामान्य टिकटको मूल्य ३०० रुपैयाँ तोकिएको थियो । प्लेअफ र फाइनलबाहेका दिनमा भने साधारण टिकेट ३०० रुपैयाँ र भीआईपी टिकेट पाँच सय रुपैयाँ रहेको छ । 

त्यस्तै साधारण र भीआईपी दुवैका लागि सिजनल टिकेट समेत उपलब्ध गराइएको छ । जसअनुसार साधारण सिजनल टिकेटको मूल्य छुट सहित चार हजार ४८० रुपैयाँ रहेको छ भने भीआईपी सिजनल टिकेटको मूल्य छुटसहित आठ हजार २८० रुपैयाँ तोकिएको छ ।

१५ मंसिरदेखि ६ पुससम्म कीर्तिपुरस्थित त्रिभुवन विश्वविद्यालय क्रिकेट मैदानमा आयोजना हुने लिगमा आठ फ्रेन्चाइज टिम भिड्दैछन् ।

 

पछिल्लो अध्यावधिक: मंसिर १२, २०८१ ११:२

टिप्पणीहरू