आईओएस १८ उपलब्ध, अब आईफोनमा पनि कल रेकर्ड गर्न सकिने

असोज १, २०८१ १३:५३

काठमाडौं । एप्पलले आधिकारिक रूपमा आईओएस १८ सार्वजनिक गरेको छ । आईफोन १६ सार्वजनिक गरेसँगै कम्पनीले सोमबार नयाँ अपरेटिङ सिस्टम आईओएस १८ को पूर्ण भर्सन उपलब्ध गराएको हो ।

कम्पनीका अनुसार यो अपडेट विश्वभरका आईफोन प्रयोगकर्ताको कम्प्याटिबल डिभाइसमा उपलब्ध भइसकेको छ । यससँगै प्रयोगकर्ताले अब एआईसहित अन्य विभिन्न आकर्षक फिचरहरू प्रयोग गर्न पाउनेछन् । केही विशेष फिचरहरू भने आईफोन १५ प्रो मोडेल र आईफोन १६ का नयाँ मोडेलमा मात्र उपलब्ध हुने बताइएको छ ।

कुन-कुन मोडेलले सपोर्ट गर्छन् आईओएस १८ अपडेट ?

आईफोन एसई (सेकेन्ड जेनेरेसन)
आईफोन एसई (थर्ड जेनेरेसन)
आईफोन एक्सआर
आईफोन एक्सएस
आईफोन एक्सएस म्याक्स
आईफोन ११
आईफोन ११ प्रो
आईफोन ११ प्रो म्याक्स
आईफोन १२
आईफोन १२ मिनी
आईफोन १२ प्रो
आईफोन १२ प्रो म्याक्स
आईफोन १३
आईफोन १३ मिनी
आईफोन १३ प्रो
आईफोन १३ प्रो म्याक्स
आईफोन १४
आईफोन १४ प्लस
आईफोन १४ प्रो
आईफोन १४ प्रो म्याक्स
आईफोन १५
आईफोन १५ प्लस
आईफोन १५ प्रो
आईफोन १५ प्रो म्याक्स
आईफोन १६
आईफोन १६ प्लस
आईफोन १६ प्रो
आईफोन १६ प्रो म्याक्स

आईओएस १८ इन्स्टल गर्नका लागि सबैभन्दा पहिले सेटिङमा जानुहोस् । त्यसपछि जेनेरलको अप्सन छान्नुहोस् । अनि, सफ्टवेयर अपडेटको अप्सनमा गई इन्स्टल गर्नुहोस् ।

आईओएस १८ का मुख्य फिचरहरू

कम्पनीले आईओएस १८ सँगै डिभाइसलाई प्रयोगकर्ताले आफ्नो आवश्यकता अनुसार कस्टमाइज गर्न सक्नेछन् । यसमा नयाँ तरिकाले होमस्क्रिनमा एप र विजेट्स राख्न सकिन्छ । त्यस्तै यसमा भिन्नाभिन्नै एप आइकन पनि छान्न सकिनेछ । एपलाई आफूले चाहेको ठाउँमा राख्न सकिने फिचर यसअघि एन्ड्रोइडले उपलब्ध गराएको थियो ।

त्यस्तै फोटोज एपमा पनि ठूलो अपडेट उपलब्ध गराइएको छ । यससँगै फोटो सजिलै फेला पार्न सकिने जनाइएको छ । यसमा फोटोहरू रिसेन्ट डेज (पछिल्ला दिनका फोटो), पिपुल एन्ड पेट, ट्रिप आदि कुनको फोटो हो भन्ने पत्ता लगाई त्यही फोल्डरमा राखिदिने बताइएको छ ।

नयाँ अपडेटले आईमेसेजलाई पनि स्तरीय बनाएको छ । प्रयोगकर्ताले अब आईमेसेजबाट बोल्ड, इटालिक, अन्डरलाइन टेक्स्ट पठाउन सक्नेछन् । यसमा नयाँ टेक्स्ट इफेक्ट पनि समावेश गरेको छ । नेटवर्क नभएको अवस्थामा अब आईमेसेजबाटै एसओएस मेसेज पठाउन र पाउन सकिनेछ । एप्पल डिभाइस नहुने प्रयोगकर्तालाई एप्पल डिभाइसका प्रयोगकर्ता इन्टरनेटको सहायताले ‘आरसीएस’ मेसेज पठाउन सक्नेछन् ।

आईओएस १८ सँगै एप्पलले कल रेकर्डिङको फिचर पनि थपेको छ । तर, रेकर्ड गर्दा त्यसको जानकारी अर्को व्यक्तिले पनि थाहा पाउँछ । कलमा भएको कुराकानीलाई फोनले तत्कालै शब्दमा उतारिदिने कम्पनीले उल्लेख गरेको छ । तर, यस फिचरले कुन-कुन भाषा सपोर्ट गर्छ भन्ने खुलाइएको छैन । आवाजको भरमा उतारिएको शब्द नोट एपमा भण्डारण हुने कम्पनीले ब्लगमा उल्लेख गरेको छ ।

मेल एपले पनि विशेष फिचरहरू पाएको छ । नयाँ अपडेटसँगै अब प्रयोगकर्ताको इनबक्समा आएका मेल ट्रान्जेक्सन, अपडेट, र प्रोमोसन गरी विभिन्न ग्रुपमा रहनेछन् । सफारी एपलाई विश्वकै सबैभन्दा फास्ट ब्राउजर भएको दाबी एप्पलले गर्दै आएको छ । यसलाई थप स्तरीय बनाउन कम्पनीले एआई फिचर समावेश गरेको छ ।

यससँगै प्रयोगकर्ताले कुनै वेबपेज खोले भने त्यसको सारांश पेजमा देखिन्छ । अब आईओएस १८ सपोर्ट गर्ने डिभाइसमा पासवर्ड एप प्रयोग गर्न सकिनेछ । यसले प्रयोगकर्ताको पासवर्ड, पासकोड र भेरिफिकेसन कोड एकै ठाउँमा सुरक्षित रूपमा भण्डारण गरिदिनेछ ।

आईओएस १८ इन्स्टल गरे पनि एप्पल इन्टेलिजेन्सका फिचरहरू भने आगामी महिनादेखि मात्र उपलब्ध हुने कम्पनीले जनाएको छ । एप्पल इन्टेलिजेन्सको सहायताले लेख्न, रिराइटिङ गर्न, प्रुफरिडिङ गर्न र साराशं तयार पार्न सक्नेछन् । यो फिचर मेल, नोट्स, पेज, र थर्ड पार्टी एपमा प्रयोग गर्न सकिनेछ । एप्पल इन्टेलिजेन्ससँगै उपलब्ध हुने क्लिनअप फिचरको सहायताले आईफोनमा फोटोको अनाश्यक ब्याकग्राउन्ड र न्वाइज हटाउन सकिनेछ ।

आईओएस १८ सँगै एप्पल प्रयोगकर्ताले सिरीको सबैभन्दा स्तरीय भर्सन प्रयोग गर्न पाउनेछन् । सिरीमा कम्पनीले नयाँ डिजाइन पनि उपलब्ध गराएको छ । सिरी एक्टिभ भएको समयमा फोनको कुनामा लाइट बलेको देख्न सकिन्छ ।

आईओएस १८ अपडेटमा कम्पनीले एसओएस लाइभ भिडिओको सुविधा पनि उपलब्ध गराएको छ । आपत्कालीन अवस्थामा टेक्स्ट पठाउन नसकिने अवस्था भए सोझै लाइभ भिडिओ पनि पटाउन सकिनेछ । यससँगै हेल्थ एप, फिटनेस एप र एक्सेसिबिलिटी फिचरलाई पनि कम्पनीले स्तरीय बनाएको छ ।

पछिल्लो अध्यावधिक: असोज १, २०८१ १३:५८

टिप्पणीहरू