ओक्लाले भन्यो- नेपालमा मोबाइल इन्टरनेटतर्फ एनसेल उत्कृष्ट

काठमाडौं । मोबाइल र ब्रोडब्यान्ड नेटवर्क इन्टेलिजेन्स कम्पनी ओक्लाले नेपालमा एनसेलको मोबाइल इन्टरनेट उत्कृष्ट रहेको देखाएको छ । गत जनवरीदेखि जुनसम्म छ महिनाको अवधिमा गरिएको परीक्षणले एनसेल आजियाटाको नेटवर्क बलियो देखाएको हो ।

मोबाइल डेटाको डाउनलोड र अपलोड गतिमा हासिल भएको स्पीडका आधारमा एनसेललाई यो सम्मान प्रदान गरिएको हो ।

ओक्लाका अनुसार एनसेलको नेटवर्कमा डाउनलोडतर्फ १७.३१ एमबीपीएस र अपलोडमा ९.२६ एमबीपीएस गति हासिल भएको छ ।

दोस्रो नम्बरमा रहेको नेपाल टेलिकमको नेटवर्कमा डाउनलोडतर्फ १६.२३ एमबीपीएस र अपलोडमा ७.५६ एमबीपीएस गति हासिल भएको जनाइएको छ ।

जनवरीदेखि जुनसम्मको अवधिमा इन्टरनेटको गति मापन ओक्ला प्रयोग गर्ने ग्राहकको आधारमा गरिएकाे हाे । यो अवधिमा आईओएस र एन्ड्रोइडमा गरी कुल १६ हजार ९ सय २९ स्पीडटेस्ट भएका थिए ।

ओक्लाका अनुसार परीक्षण नतिजा देशमा सामान्यतया उपलब्ध सबैभन्दा छिटो मोबाइल गति हासिल गर्न सक्षम भनि पहिचान गरिएका डिभाइसहरूमा लिइएका ‘सबै’ सेलुलर परीक्षणहरू समावेश रहेका छन् ।

अवार्डका बारेमा आफ्नो धारणा राख्दै एनसेलका प्रमुख कार्यकारी अधिकृत एन्डी चोङले भने, ‘नेपाललाई उच्च गतिको मोबाइल ब्रोडब्यान्डका साथ यसले दिने लाभसँग आम उपभोक्तालाई जोड्ने हाम्रो निरन्तरको प्रयासलाई विश्वको अग्रणी स्पीड टेस्टिङ कम्पनी ओक्लाले नेपालको ‘फास्टेस्ट मोबाइल नेटवर्क’ को मान्यता प्रदान गरेकोमा हामी निकै हर्षित छौं ।’

यो अवार्ड हामीले आफ्नो प्रतिवद्धता बमोजिम सेवा प्रदान गरिहेका छौं भन्ने प्रमाण हो । उनले भने, ‘यस अवसरमा हाम्रा सबै सरोकारवालाहरुलाई उनीहरुले विश्वास र ग्राहकहरुलाई सबैभन्दा उच्च गतिको मोबाइल डेटा सेवा प्रदान गर्नका लागि पु¥याएको सहयोग प्रति आभार व्यक्त गर्न चाहन्छु ।’

हरेक वर्ष एनसेलले आफ्ना ग्राहकलाई गुणस्तरीय सेवा प्रदान गर्ने उद्देश्यले आफ्नो पूर्वाधारमा निरन्तर लगानी गर्दै आएको छ । देशको ८५ प्रतिशत जनसंख्यालाई उच्च गतिको मोबाइल ब्रोडब्याण्ड सेवा फोरजीमा पहुँच सुनिश्चित गराउँदै, एनसेलले जुन २०१७ बाट सञ्चालन ल्याएको यो सेवा हाल ७० भन्दा बढी जिल्लामा विस्तार गरिसकेको छ ।

“ओक्लाद्वारा प्रदान गरिने स्पीडटेस्ट अवार्डहरु विश्वका सबैभन्दा फास्ट र शीर्ष प्रदर्शन गर्ने फिक्स्ड ब्रोडब्याण्ड र मोबाइल सेवा प्रदायकहरुलाई प्रदान गरिने विशिष्ट सम्मानहरु हुन् । एनसेललाई नेपालको ‘फास्टेस्ट मोबाइल नेटवर्क अवार्ड’ प्रदान गर्न पाउँदा हामी खुसी छौं । यो अवार्ड एनसेलले जनवरी–जुन २०२२ को अवधिमा गरेको उत्कृष्ट प्रस्तुतिको प्रमाण हो र यो अवार्ड उपभोक्ताहरु आफैले गरेका स्पीडटेस्ट ओक्लाको कठोर विश्लेषणमा आधारित छ,” ओक्लाका प्रमुख कार्यकारी अधिकृत डग सटल्सले भने ।

यसै वर्ष मार्चमा एनसेल ‘एसियन टेलिकम अवार्ड २०२२’ को ‘टेलिकम कम्पनी अफ द इयर’ र इन्टिग्रेटेड डेटा सेन्टर स्थापनाका लागि ‘इन्फ्रास्ट्रक्चर इनिसिएटिभ अफ द इयर’ अवार्डबाट सम्मानित भएको थियो ।

त्यसैगरी अप्रिल महिनामा काठमाडौंमा आयोजित १४ औं एचआर मिट सम्मेलनमा एनसेल ‘एक्सिलेन्स् इन इम्प्लोयर ब्राण्ड अवार्ड २०२२’ बाट सम्मानित भएको थियो ।

नेपालका लागि ओक्लाको स्पीडटेस्ट अवार्ड रिपोर्ट हेर्नका लागि यो लिङ्क क्लिक गर्नुहोस् ।

पछिल्लो अध्यावधिक: असोज २, २०७९ २२:३३

टिप्पणीहरू