माघ १८ गते हुँदै सामसङ अनप्याक्ड इभेन्ट, एस २३ सहित सार्वजनिक हुदैँछन् यी डिभाइस
माघ १२, २०७९
काठमाडौँ । आगामी बुधबार सामसङले बहुप्रतिक्षित सामसङ एस २३ फोन सार्वजनिक गर्ने भएको छ । कम्पनीले ग्यालेक्सी अनप्याक्ड इभेन्ट आयोजना गर्दै विभिन्न उत्पादनहरू लन्च गर्ने भएको हो ।
सामसङ एस २३ सिरिजसँगै कम्पनीले टिभी, मोनिटर, जेट फोल्ड, भीआर हेडसेट, स्मार्टवाच सार्वजनिक गर्ने अपेक्षा गरिएको छ । मार्केट शेयरका हिसाबले सामसङ विश्वको सबैभन्दा ठूलो स्मार्टफोन निर्माता कम्पनी हो । स्मार्टफोनसँगै सामसङले बजारमा वेरएबल डिभाइस पनि ल्याउन थालेको छ । आज हामी सामसङले माघ १८ गते सार्वजनिक गर्नसक्ने विभिन्न डिभाइसको बारेमा जानकारी दिँदैछौँ ।
सामसङले बनाएका विभिन्न स्मार्टफोनमध्ये एस २३ लाइनअपलाई अहिलेसम्मकै उत्कृष्ट फोनमा रूपमा प्रस्तुत गरिएको छ । तीन फरक मोडेल जस्तै बेस, प्लस र अल्ट्रामा यो फोन उपलब्ध हुने बाहिरिएका विवरणले उल्लेख गरेका छन् ।
एस २३ को बेस तथा प्लस मोडेलमा सामान्य रिफ्रेशरेट हुनेछ भने अल्ट्रामा स्तरीय रिफ्रेश रेट हुने अपेक्षा छ । साथै यी मोडेलमा नयाँ प्रोसेसर, केही अपडेट गरिएको डिजाइन र सुधारिएको क्यामेरा समावेश हुने बताइएको छ ।
सबैभन्दा महत्त्वपूर्ण विशेषता भनेको अल्ट्रामा कम्पनीले नै तयार पारेको आइसोसेल एडएचपी २ सेन्सर प्रयोग हुनेछ । जो २०० मेगापिक्सेलको हुने कम्पनीले जनाएको छ ।
ग्यालेक्सी जेड फोल्ड ५
कम्पनीले सार्वजनिक गर्न लागेको अर्को स्मार्टफोन हो ग्यालेक्सी जेट फोल्ड फाइभ । 'एस पेन' समावेश भएको यस फोनलाई फोन र ट्याब्लेटको हाइब्रिड भनेर चर्चा गरिएको छ ।
अधिकतम विशेषता ग्यालेक्सी जेट फोल्ड फोरसँग मिले तापनि सेन्सर, क्यामेरा, प्रोसेसरमा भने यो डिभाइस अब्बल रहने बताइएको छ । यससँगै कम्पनीले फोल्डेबल ग्यालेक्सी डिभाइस सार्वजनिक गर्ने विभिन्न लिकमा उल्लेख छ ।
यस डिभाइसका बारेमा कम्पनीले कुनै विवरण बाहिर ल्याएको छैन । यस डिभाइसलाई फ्लेक्स हाइब्रिड नाम दिइने अपेक्षा छ ।
ग्यालेक्सी जेड फ्लिप फाइभ
पकेटमा अटाउन सक्ने फोल्डेबल ग्यालेक्सी जेट फ्लिप फाइभ कम्पनीले सार्वजनिक गर्न लागेको अर्को फोन हो । ग्यालेक्सी जेट फ्लिक फोरकै डिजाइनमा उपलब्ध हुने यो फोनमा नयाँ प्रोसेसर, उच्च गुणस्तरको क्यामेरा, ठूलो कभर स्क्रिन हुने अपेक्षा छ । बाहिरिएका केही विवरणमा ग्यालेक्सी जेट फ्लिप फाइभको मूल्य भने फोर जत्तिकै रहने बताइएको छ ।
ग्यालेक्सी भीआर हेडसेट
पछिल्लो समय प्रविधि कम्पनीहरू भीआर हेडसेटमा आफूलाई अब्बल बनाउन लागिपरेका छन् । आउँदो महिना एप्पलले प्लेस्टेसन भीआर २, एचटीसी भाइभ एक्सआर, र भीआर हेडसेट सार्वजनिक गर्ने अपेक्षा गरिएको छ ।
तर, सामसङ भने भीआर हेडसेटको सन्दर्भमा त्यति सक्रिय थिएन । यस पटक भने कम्पनीले भीआर हेडसेट पनि सार्वजनिक गर्ने अपेक्षा गरिएको छ ।
ग्यालेक्सी वाच सिक्स
सामसङले हालसम्म सार्वजनिक गर्न लागिएको स्मार्टवाचबारे धेरै जानकारी दिएको छैन । यसबारे विवरण पनि बाहिरिएका छैनन् ।
कम्पनीले यसअघि सार्वजनिक गरेको ग्यालेक्सी वाच फाइभ र फाइभ प्रोलाई हेर्ने हो भने नयाँ स्मार्टवाचमा स्तरीय सेन्सर समावेश हुने अपेक्षा छ ।
पछिल्लो अध्यावधिक: माघ १२, २०७९
