पेपालमा काम सुरु गर्नुभन्दा केही समय अगाडि युट्युबका संस्थापकहरूसँग रहेर काम गरेका रियोलोफ बोथाले भन्छन्, “युट्युबमा लगानी गर्नका लागि सिकी वा क्यापिटल नामको कम्पनी स्थापना गरिएको थियो । सुरुवातदेखि हामीले कानुनी टोलीसँग काम गर्यौं र एउटा कन्टेन्ट मोडरेसन टिमको पनि स्थापना गर्न सुरु गर्यौं । तर त्यसले लगत्तै साइटलाई तल झार्यो । यदि तपाईंले फिल्टर राख्न थाल्नुभयो भने क्यान्सरले जस्तै गरी तपाईंको साइटलाई यसले गाँच्न थाल्छ ।” त्यसबेला कानुनी जोखिम युट्युबका लागि सबैभन्दा ठूलो चुनौती बनेको बोथा बताउँछन् ।
त्यो बेला चार्ड र स्टिभको मनमा कम्पनीलाई बचाइ राख्नु फाइदाको विषय होला त भन्ने प्रश्न उब्जियो । “लडाइँ लडिरहनका लागि हामीसँग आवश्यक संसाधन थिएन,” बोथाले भने । युट्युबका जनरल काउन्सिल तथा व्यावसायिक मामिलाका भिपी लेभन युट्युब अगाडि नबढ्ने सोच आफ्नो मनमा आएको दिन सम्झिन्छन् । “पूर्वाधारको माग उच्च थियो । कम्पनीको बैंक खाता बिस्तारै शून्यमा झर्दै थियो । म्युजिक कम्पनीहरूले करोडौं डलर माग गरिरहेका थिए । साझेदारी गर्नका लागि अन्य खेलाडीहरूले युट्युबको ढोका ढकढकाइ रहेका थिए । हामीले सक्दो प्रयास गरिरहेका थियौं,” उनी भन्छिन् । सीएफओ यू भन्छन्, “जब यी सबै तत्वहरू एक ठाउँ आएर बस्छन् तब पैसा उठाउन गाह्रो हुन्छ । जब पैसा सङ्कलन हुन्छ तब मात्र धेरै पैसा पूर्वाधारमा लगानी गर्न सकिन्छ र लगानीकर्ताहरूसँग पनि सम्भावित डिलहरू सम्भव हुन्छ ।”
एक साँझ युट्युब कम्पनी र युनिभर्सल म्युजिकबीच विवादपूर्ण बैठक भयो । उक्त बैठक धेरै नै आक्रामक थियो । बोथाका अनुसार युनिभर्सल म्युजिकले युट्युबमाथि कपिराइट उल्लङ्घन गरेको आरोप लगाएको थियो । अर्को दिन चेन र हरले युट्युब अफिस नजिक रहेको बारमा गए । यी दुई जना रातको समयमा कहिलेकाहीँ कम्पनीको बारेमा कुराकानी गर्न त्यहाँ जाने गरेका थिए । सान मेटियोको ब्लक वरिपरि उनीहरू एकछिन डुले । त्यसपछि बारमा उनीहरूले कम्पनी बिक्री गर्न चाहेको कुरा युलाई बताए ।
युका अनुसार चेन र हर दुवै जना लगातारका विवादित बैठकहरूबाट निराश भइसकेका थिए । कपिराइट उल्लङ्घनका बैठकहरू अझै आक्रामक बन्दै थिए । ती दुई युवाले राम्रो प्रोडक्ट दिनका लागि युट्युबको सुरुवात गरेका थिए, न कि त्यो दिन देख्न । संस्थापकहरूको समूहले पूर्वाधारको समस्या समाधान गर्न सक्ने तथा सन्तोषजनक डिल गर्न सक्ने ठूला कम्पनीहरूलाई युट्युबको स्वामित्व बिक्री गर्दा कस्तो होला भन्ने विषयमा छलफल गरे ।
युट्युबको बोर्ड र लगानीकर्तासँग परामर्श लिएपछि अब अधिग्रहणको बाटोतर्फ अघि बढ्ने कुरामा सबैको सहमति भयो ।
