वर्ल्डलिङ्कका ग्राहकलाई सेटटप बक्सविना नै टिभीमा विश्वकप फुटबल हेर्न पाउने सुविधा
जेठ २५, २०८३ १७:१४
काठमाडौं । इन्टरनेट सेवाप्रदायक वर्ल्डलिङ्कका ग्राहकले सेटटप बक्सको प्रयोगविना नै टेलिभिजनमा विश्वकप फुटबल खेल हेर्न सक्ने भएका छन् । सेट-टप बक्स नभए तापनि स्मार्ट टेलिभिजनमा नेटटिभी एपमार्फत विश्वकपका खेल प्रत्यक्ष हेर्न मिल्ने कम्पनीले जनाएको छ ।
कम्पनीका अनुसार, यो सुविधा उपयोग गर्नका लागि ग्राहकसँग स्मार्ट टेलिभिजन, वर्ल्डलिङ्कको इन्टरनेट जडान र नेपालका लागि विश्वकप प्रसारणको आधिकारिक अनुमति प्राप्त ‘हिमालय स्पोर्ट्स’ को विश्वकप प्याकेज खरिद गरेको हुनुपर्ने छ ।
यो प्रक्रियाका लागि ग्राहकले सबैभन्दा पहिले आफ्नो स्मार्ट टेलिभिजनको ‘एप स्टोर’ वा ‘प्ले स्टोर’ मा गई नेटटिभी एप डाउनलोड गर्नुपर्ने हुन्छ ।
एप डाउनलोड भइसकेपछि त्यहाँ मोबाइल नम्बर प्रविष्ट गर्ने विकल्प आउनेछ, जहाँ ग्राहकले वर्ल्डलिङ्कमा रजिस्टर गरेको आफ्नो मोबाइल नम्बर राख्नुपर्नेछ । उक्त मोबाइल नम्बरमा प्राप्त हुने ओटीपी कोड प्रविष्ट गरेपछि नेटटिभी एप सक्रिय हुनेछ ।
त्यसपश्चात्, ९९९ रुपैयाँ शुल्क पर्ने विश्वकप पास खरिद गरेपछि खेलहरू प्रत्यक्ष हेर्न सकिने वर्ल्डलिङ्कले जनाएको छ । अतिरिक्त तार र भौतिक उपकरण (सेटटप बक्स) को झन्झटविना नै सहज रूपमा विश्वकप हेर्न पाइने भएपछि ग्राहकलाई निकै सजिलो हुने कम्पनीको विश्वास छ ।
पछिल्लो अध्यावधिक: जेठ २५, २०८३ १८:१८
