काठमाडौं । प्रविधिको दिग्गज कम्पनी गुगलले चाँडै गुगल वालेट एप सार्वजनिक गर्ने भएको छ । गुगल आई ओ २०२२ कार्यक्रममा जसको एउटा झलक देखाइएको थियो । यसलाई डिजिटल वालेटको नामबाट समेत चिन्ने गरिन्छ ।
डिजिटल वालेटले तपाईँको पुरानो वालेट अर्थात पर्सलाई नै प्रतिस्थापित गर्ने चर्चा समेत चल्न थालेको छ । गुगल वालेट एउटा यस्तो एप हुनेछ, जुन एन्ड्रोइड र आईओएस दुवै प्रयोगकर्ताका लागि सार्वजनिक गरिनेछ ।
यसलाई अनलाइन भुक्तानीको दुनियाँमा ठूलो परिवर्तनको रुपमा समेत हेर्न थालिएको छ । गुगल वालेटमा तपाईँले आफ्नो नियमित पर्सका सम्पूर्ण आवश्यकता पूर्ति गर्न सक्नुहुनेछ ।
यसको अर्थ आगामी दिनमा गुगल वालेटले तपाईँलाई खल्तीमा पर्स राख्न जरुरी हुनेछैन । गुगल वालेटमा तपाईँको क्रेडिट, डेबिट तथा अन्य कार्डहरू रहनेछन् ।
साथै एपमा ट्रान्जिट कार्ड, भ्याक्सिन सर्टिफिकेट, फ्लाइट टिकेट, बसको टिकेट, सरकारी परिचयपत्र र कारको चाबी समेत थप गर्न सकिनेछ । कारको चाबीमा भर्चुअल रुपमा पहुँच पाउन सकिनेछ ।
साधारण शब्दमा भन्ने हो भने तपाईँले स्मार्टफोनबाटै आफ्नो कार स्टार्ट गर्न सक्नुहुनेछ । हाल प्रचलनमा रहेको गुगल पेसँगै डिजिटल वालेटको विकल्प दिइनेछ ।
तर गुगलले गुगल वालेटकै नामबाटै छुट्टै एप सार्वजनिक गर्न सकेन अनुमान समेत गरिएको छ । गुगल वालेट एउटा लक-इन वन कार्ड सोलुसन हुनेछ ।
यससँगै गुगल वालेटलाई ह्याक गर्न सकिनेछ कि छैन भन्ने प्रश्न समेत उठ्न थालेका छन् । यस बारेमा गुगलले वालेटका सम्पूर्ण डेटा इन्क्रिप्टेड हुने बताएको छ । यस्तोमा गुगल वालेटलाई ह्याक गर्न असम्भव हुनेछ ।
यद्यपि गुगलभन्दा अगावै प्रतिस्पर्धी कम्पनीले एप्पल वालेटको सुविधा सुरु गरिसकेको छ । गुगलको तर्फबाट केही देशमा डिजिटल वालेटमा गुगल पे इनबिल्ड हुनसक्ने सम्भावना समेत रहेको छ ।