एप्पलको सस्तो ल्यापटप म्याकबुक नियो सार्वजनिक, पावरफुल ए१८ प्रो चिप र १६ घण्टा टिक्ने ब्याट्री

काठमाडौँ । एप्पलले ल्यापटप बजारमा आफ्नो नयाँ र किफायती मोडेल म्याकबुक नियो सार्वजनिक गरेको छ । 'हेलो, नियो' स्लोगनका साथ सार्वजनिक गरिएको यो ल्यापटपले उच्च कार्यक्षमता र आकर्षक डिजाइनलाई कम मूल्यमा उपलब्ध गराउने लक्ष्य राखेको छ ।

म्याकबुक नियोको सुरुवाती मूल्य ५९९ अमेरिकी डलर (वा प्रति महिना ४९.९१ डलरको किस्ता) तोकिएको छ । यसको प्रि-अर्डर प्रक्रिया सुरु भइसकेको छ भने आगामी ११ मार्च, २०२६ देखि यो बजारमा पूर्ण रूपमा उपलब्ध हुनेछ ।

यस ल्यापटपमा एप्पलको शक्तिशाली ए१८ प्रो चिप समावेश गरिएको छ, जसमा ६-कोर सीपीयू र ५-कोर जीपीयू रहेको छ । यो चिपले दैनिक प्रोडक्टिभ कामहरू, शैक्षिक सामग्री निर्माण र गेमिङलाई अत्यन्तै सहज बनाउँछ । परीक्षणका क्रममा यसले एक पटकको फुल चार्जमा १६ घण्टासम्मको ब्याट्री लाइफ दिने देखिएको छ । जुन विद्यार्थी र कार्यालयका कर्मचारीहरूका लागि उपयुक्त छ ।

म्याकबुक नियोमा १३ इन्चको लिक्विड रेटिना डिस्प्ले रहेको छ । यसमा ५०० निट्स ब्राइटनेस र १ अर्ब रङहरूको सपोर्ट छ, जसले ३६ लाख पिक्सेलको उच्च रिजोलुसन प्रदान गर्दछ । यो ल्यापटप सिल्भर, ब्लश, साइट्रस र इन्डिगो गरी चारवटा सुन्दर रङहरूमा उपलब्ध छ । यसको किबोर्ड र ट्र्याकप्याड पनि रङ अनुसार नै मिलाइएको छ ।

यो ल्यापटप विशेष रूपमा एप्पल इन्टेलिजेन्सका लागि निर्माण गरिएको छ । यसमा रहेका एआई फिचरहरूले प्रयोगकर्तालाई लेखनमा मद्दत गर्ने टुल, फोटोबाट नचाहिने वस्तु हटाउने क्लिन अप र नयाँ इमोजीहरू बनाउने (जेनमोजी) जस्ता सुविधाहरू प्रदान गर्छन् । यसमा सिरी अझ प्रभावकारी हुनुका साथै च्याटजीपीटी र क्यानभा जस्ता एपहरू पनि राम्रोसँग चल्छन् ।

क्यामेरा, अडियो र कनेक्टिभिटी भिडिओ कलका लागि यसमा १०८० पी फेसटाइम एचडी क्यामेरा रहेको छ । अडियोको कुरा गर्दा यसमा दुईवटा 'साइड-फायरिङ' स्पिकरहरू छन्, जसबाट डल्बी एटमससहितको स्थानिक अडियो (Spatial Audio) अनुभव पाउन सकिन्छ । कनेक्टिभिटीका लागि यसमा दुईवटा यूएसबी-सी पोर्ट र एउटा ३.५ एमएम हेडफोन ज्याक उपलब्ध छ । सुरक्षाका लागि यसमा टच एचडी फिचर समावेश गरिएको छ, जसले गर्दा लगइन र भुक्तानी प्रक्रिया सुरक्षित हुन्छ ।

म्याकबुक नियो र आईफोनबिचको समन्वय जादुमयी रहेको एप्पलले बताएको छ । आईफोन मिररिङ मार्फत प्रयोगकर्ताले ल्यापटपको स्क्रिनमै आफ्नो आईफोन चलाउन सक्छन् । साथै युनिभर्सल क्लिपबोर्ड, एयरड्रप र ह्यान्डअफ जस्ता सुविधाहरूले गर्दा एक डिभाइसमा सुरु गरेको काम अर्कोमा सजिलै पूरा गर्न सकिन्छ ।

एप्पलले यो ल्यापटपलाई वातावरण मैत्री बनाउन विशेष ध्यान दिएको छ । यो ९० प्रतिशत रिसाइकल गरिएको आल्मुनियम बाट बनेको छ र समग्रमा यसमा ६० प्रतिशत रिसाइकल गरिएका सामग्रीहरू प्रयोग भएका छन् । यसको प्याकेजिङ पनि १०० प्रतिशत फाइबरमा आधारित छ, जसमा प्लास्टिकको प्रयोग गरिएको छैन ।

यो नयाँ म्याकबुक नियोले विशेष गरी विद्यार्थी, साना व्यवसायी र पहिलो पटक म्याक प्रयोग गर्न चाहनेहरूका लागि एक उत्कृष्ट र सुलभ विकल्प प्रदान गरेको छ ।

 

पछिल्लो अध्यावधिक: फागुन २१, २०८२ १९:३२

टिप्पणीहरू