पाकिस्तानले लगायो टिकटकमाथि प्रतिबन्ध, अश्लीलता फैलाएको आरोप

काठमाडौं । भारत र अमेरिका पछि अब पाकिस्तानमा समेत टिकटकमाथि प्रतिबन्ध लागेको छ । अश्लीलता र अभद्रता फैलाएको भन्दै पाकिस्तानको दूरसञ्चार प्राधिकरणले भिडियो शेयरिङ प्लेटफर्म टिकटकमाथि प्रतिबन्ध लगाएको हो ।

यस अघि पाकिस्तानले पब्जी माथि समेत प्रतिबन्ध लगाइसकेको छ । पाकिस्तान सरकारको यो निर्णयलाई लिएर टिकटकबाट कुनै धारणा सार्वजनिक भएको छैन ।

पाकिस्तानमा टिकटकका करिब चार करोड प्रयोगकर्ता रहेका छन् । पछिल्लो समय टिकटक पाकिस्तानमा सबैभन्दा धेरै डाउनलोड हुने एपको सूचीमा तेस्रो नम्बरमा छ ।

ह्वाट्सएप र फेसबुक मात्र पाकिस्तानमा टिकटकभन्दा अघि छन् । पाकिस्तान सरकारले एप विरुद्ध जनस्तरबाट थुप्रै गुनासाहरु बइरहेको बताएको छ ।

दुई महिना अघि मात्र लाहोर उच्च अदालतमा टिकटकमाथि प्रतिबन्ध लगाउन माग गर्दै एक मुद्दा दर्ता गरिएको थियो । जसमा एप पोर्नोग्राफीको ठूलो स्रोत बनेको उल्लेख गरिएको थियो ।

Pakistan's Telecommunication Authority blocks Chinese app TikTok after the company failed to fully comply with instructions for “development of an effective mechanism for proactive moderation of unlawful online content”, reports Pakistan's Geo News pic.twitter.com/lH3Iw64Ws4

— ANI (@ANI) October 9, 2020

सँगसँगै पाकिस्तान सरकारले उक्त मामिलामा आफ्नो धारणा सार्वजनिक गर्दै यस प्रकार एपबाट युवाहरुको शारीरिक तथा मानसिक स्वास्थ्यमा नकारात्मक असर पर्न थालेको प्रतिक्रिया दिएको थियो । इमरान सरकारले यस विषयलाई लिएर एउटा चेतावनी समेत जारी गरेको थियो ।

पाकिस्तानी न्युज च्यानल जियो न्युजका अनुसार यस सन्दर्भमा पाकिस्तानको दूरसञ्चार प्राधिकरणले गत जुलाईमै टिकटकलाई यस्तो चेतावनी दिएको थियो ।

चेतावनीका बावजूद समेत टिकटकको तर्फबाट सरकारी चिन्ताको विषयलाई नजरअन्दाज गरिएको र त्यसका लागि कुनै उचित कदम नउठाएको बताइएको छ । त्यसै कारण पाकिस्तान सरकार एपमाथि प्रतिबन्ध लगाउने अवस्थामा पुगेको हो ।

पछिल्लो अध्यावधिक: असोज २, २०७९ २२:३४

टिप्पणीहरू