काठमाडौं । हुन त गुगल तथा एप्पलको आधिकारिक स्टोरबाट एप डाउनलोड गर्नु सुरक्षित नै मानिन्छ । किन भने त्यस्ता स्टोरमा ‘मालिसियस’ (खराब आसय भएका) एप रोक्नका लागि विभिन्न प्रविधिको प्रयोग गरिएको हुन्छ ।
तर, पनि कतिपय अवस्थामा गुगल तथा एप्पलका त्यस्ता प्रविधिलाई समेत छलेर क्रियटरहरूले स्टोरमा एप अपलोड गर्न सफल हुन्छन् । त्यस्ता ३५ ओटा मालवेयर युक्त एप यतिबेला गुगल प्ले स्टोरमा भेटिएका छन् ।
जसलाई प्रयोगकर्ताले लाखौं पटक डाउनलोड गरिसकेका छन् । यदि तपाईँको मोबाइलमा समेत यी एप छन् भने तत्कालै हटाउन साइबर अनुसन्धानकर्ताहरूले आग्रह गरेका छन् ।
साइबर सेक्युरिटी कम्पनी ‘बिटडिफेण्डर’ले प्ले स्टोरमा रहेका मालवेयर युक्त ३५ ओटा एपको सूची सार्वजनिक गरेको हो । यस्ता एप प्रयोगकर्ताले मोबाइलमा डाउनलोड गरेसँगै आइकन, एपको नाम लगाएका सबै कुरा परिवर्तन हुने र डिभाइसमा लुकेर बस्ने जनाइएको छ ।
धेरैजसो यस्ता एप ‘सेटिङ’ आइकनको रुपमा लुकेर बसेका हुन्छन् । जब त्यस्तो फेक सेटिङ आइकनमा क्लिक गरिन्छ, तब उक्त एपले प्रयोगकर्तालाई वास्तविक सेटिङमै पुर्याउने जनाइएको छ ।
जसले प्रयोगकर्तालाई आफैँले सेटिङ एप प्रयोग गरिरहेको भान पार्न सफल हुन्छ । त्यतिमात्रै नभएर यस्ता एप रिसेन्ट एपमा समेत नबस्ने अनुसन्धानकर्ताहरूले जनाएका छन् ।
यस्तोमा उनीहरूले एन्ड्रोइडको सुरक्षा प्रणालीलाई नै तोडेर आफ्नै फ्रेमवर्कमा विज्ञापन चलाउने गर्छन् । यो विषय सबैभन्दा घातक रहेको अनुसन्धानकर्ताले बताएका छन् । यस्तोमा अनुसन्धानकर्ताले यदि मोबाइलमा यस्ता एप भएको खण्डमा हटाउन आग्रह गरेका हुन् ।