एप्पलले यो वर्ष ‘आईफोन फोल्ड’ सहित आईफोन १८ सिरिज ल्याउने, फेस आईडीको सट्टा अब फिङ्गरप्रिन्ट

काठमाडौँ । एप्पल विश्लेषक जेफ पुले यस वर्ष सार्वजनिक हुने एप्पलका उत्पादनबारे नयाँ खुलासा गरेका छन् । हालै एक ‘इन्भेस्टर नोट’ सार्वजनिक गर्दै जेफले एप्पलको ‘आईफोन फोल्ड’मा सुरक्षाका लागि ‘फेस आईडी’ को सट्टा ‘टच आईडी’ (फिङ्गरप्रिन्ट) हुने खुलासा गरेका हुन् । 

सन् २०२६ मा विश्वव्यापी स्मार्टफोन बजार चार प्रतिशतले खुम्चने अनुमान गरिएको छ । विशेषगरी मेमोरी चिपको बढ्दो लागत र एन्ड्रोइडका सस्ता फोनको मागमा आएको गिरावटका कारण बजार प्रभावित हुने देखिए पनि एप्पलले भने यसको प्रतिकार गर्ने रणनीति अपनाएको छ । 

विश्लेषक जेफ पुका अनुसार एप्पलले सन् २०२६ मा २५ करोड युनिट आईफोन ढुवानी गर्ने लक्ष्य राखेको छ । यो भनेको अघिल्लो वर्षको तुलनामा २ प्रतिशतको वृद्धि हो । यससँगै एप्पलको बजार हिस्सा सन् २०२४ को १९ प्रतिशत र २०२५ को २० प्रतिशतबाट बढेर २०२६ मा २१ प्रतिशत पुग्ने अनुमान छ । आईफोन १७ को बलियो मागले पनि यस वृद्धिलाई सघाउने देखिएको छ ।

आईफोन १८ सिरिज र फोल्डेबल आईफोनको विशेषता 

सन् २०२६ को सेप्टेम्बरमा एप्पलले तीन ओटा मुख्य मोडेल आईफोन १८ प्रो, आईफोन १८ प्रो म्याक्स र आईफोन फोल्ड सार्वजनिक गर्ने तयारी गरेको छ ।
 

	आईफोन १८ प्रो	आईफोन १८ प्रो म्याक्स	आईफोन फोल्ड
सार्वजनिक हुने समय	सेप्टेम्बर २०२६	सेप्टेम्बर २०२६	सेप्टेम्बर २०२६
डिस्प्ले	६.३ इन्च	६.९ इन्च	७.८ इन्च (भित्री), ५.३ इन्च (बाहिरी)
प्रोसेसर	A20 Pro, N2, WMCM	A20 Pro, N2, WMCM	A20 Pro, N2, WMCM
र्‍याम	१२ GB LPD5	१२ GB LPD5	१२ GB LPD5
अगाडिको क्यामेरा	१८ मेगापिक्सेल	१८ मेगापिक्सेल	१८ मेगापिक्सेल (फोल्ड र अनफोल्ड दुबै)
पछाडिको क्यामेरा	४८ मेगापिक्सेल (मुख्य), ४८ मेगापिक्सेल (पेरिस्कोप), ४८ मेगापिक्सेल (अल्ट्रा वाइड)	४८ मेगापिक्सेल (मुख्य), ४८ मेगापिक्सेल (पेरिस्कोप), ४८ मेगापिक्सेल (अल्ट्रा वाइड)	४८ मेगापिक्सेल (मुख्य), ४८ मेगापिक्सेल (अल्ट्रा वाइड)
फेस आइडी	स्ट्रक्चर लाइट, सानो डाइनामिक आइल्याण्ड	स्ट्रक्चर लाइट, सानो डाइनामिक आइल्याण्ड	छैन (टच आइडी रहने)
बनावट	आल्मुनियम	आल्मुनियम	टाइटेनियम + आल्मुनियम
BB चिप	एप्पल सी टु	एप्पल सी टु	एप्पल सी टु

एप्पलले सन् २०२६ को सेप्टेम्बरमा प्रो र फोल्ड मोडेल ल्याएपछि सन् २०२७ को सुरुवातममा आईफोन १८ को बेस मोडेल, आईफोन १८ई र आईफोन एयर २ सार्वजनिक गर्ने सम्भावना रहेको रिपोर्टमा उल्लेख छ ।

पछिल्लो अध्यावधिक: माघ २, २०८२ १७:४४

टिप्पणीहरू