मार्क जुकरबर्ग भन्छन्ः एआईले गर्दा सिङ्गो टिमको काम एक जना कर्मचारीले नै गर्नसक्ने समय आयो
माघ १८, २०८२ १०:१९
काठमाडौँ । सामाजिक सञ्जाल फेसबुक र इन्स्टाग्रामको मातृ कम्पनी मेटाले अब ठुला टोलीहरूको सट्टा थोरै तर दक्ष जनशक्ति र आर्टिफिसियल इन्टेलिजेन्स (एआई) को प्रयोगबाट काम गर्ने नयाँ रणनीति अघि सारेको छ । कम्पनीका कार्यकारी प्रमुख (सीईओ) मार्क जुकरबर्गले एआई उपकरणहरूको मद्दतले अब एकै जना कर्मचारीले पहिले पुरै टिमले गर्ने काम सम्पन्न गर्न सक्ने बताएका छन् ।
लगानीकर्ताहरूसँगको हालैको कुराकानीमा जुकरबर्गले कम्पनीले व्यक्तिगत योगदानकर्ताहरूलाई सशक्त बनाउन र टिमहरूलाई सानो तथा छरितो बनाउन एआई-नेटिभ उपकरणहरूमा लगानी गरिरहेको जानकारी दिएका छन् । उनले धेरै प्रतिभाशाली व्यक्तिहरूले मेटालाई आफ्नो कार्यस्थलको रूपमा रोजुन् भन्ने चाहना व्यक्त गर्दै एआईको प्रयोगले उत्पादकत्वमा ठुलो परिवर्तन ल्याउने विश्वास व्यक्त गरेका छन् ।
मेटाले आफ्नो खर्च गर्ने प्राथमिकतामा पनि ठुलो फेरबदल गरेको छ । बिजनेस इन्साइडरका अनुसार मेटाले यस वर्ष एआई क्षेत्रमा आफ्नो खर्च ६० देखि ८७ प्रतिशतसम्मले बढाउने योजना बनाएको छ । गत वर्ष नै कम्पनीले इन्जिनियरहरूको कार्यक्षमतामा उल्लेख्य वृद्धि महसुस गरेको थियो । जसको मुख्य कारण एजेन्टिक कोडिङ (एआईमार्फत कोडिङ गर्ने प्रविधि) को बढ्दो प्रयोगलाई मानिएको छ ।
यो ट्रेन्ड मेटामा मात्र सीमित छैन, बरु सिङ्गो प्रविधि क्षेत्रमा फैलिँदै गएको छ । बिजनेस इन्साइडरले उल्लेख गरे अनुसार ओपनएआईका सीईओ साम अल्टम्यानले पनि यसअघि नै अबका केही वर्षमा केवल १० जना कर्मचारी भएका कम्पनीहरूले अर्बौं डलरको मूल्याङ्कन प्राप्त गर्ने भविष्यवाणी गरेका थिए । यस्तै, गुगल, अमेजन र इन्टेल जस्ता ठुला कम्पनीहरूले पनि आफ्नो व्यवस्थापकीय तह घटाएर सङ्गठनलाई सानो र छरितो बनाइरहेका छन् । हालै मात्र अमेजनले १६ हजार कर्पोरेट कर्मचारी कटौती गर्ने घोषणा गरेको छ ।
मेटाकी प्रमुख वित्तीय अधिकृत सुसान लीले टिमहरू साना बनाउने लक्ष्य भए पनि बजारमा दक्ष एआई जनशक्तिको माग धेरै रहेको छ । गत डिसेम्बरसम्ममा मेटाको कर्मचारी सङ्ख्यामा ६ प्रतिशतले वृद्धि भएको छ, जसमा मनिटाइजेसन, पूर्वाधार र नियमनकारी निकायसँग सम्बन्धित क्षेत्रमा नयाँ नियुक्तिहरू गरिएको उनले बताएकी छिन् ।
यद्यपि, यो नयाँ कार्यदिशामा केही चुनौतीहरू पनि देखिएका छन् । जुकरबर्गले कम्प्युटिङ स्रोतको अभावका कारण केही समस्या भइरहेको स्वीकार गरेका छन् । तर, उनले सन् २०२६ सम्ममा एआईले काम गर्ने र सञ्चालन गर्ने शैलीमा नाटकीय परिवर्तन ल्याउने दृढ विश्वास व्यक्त गरेका छन् ।
मेटाको यो कदमले प्रविधि क्षेत्रमा अब धेरै सङ्ख्यामा कर्मचारी राख्नुभन्दा थोरै तर उच्च दक्ष व्यक्तिहरूलाई एआईको साथमा परिचालन गर्ने 'स्टार्टअप मोड' को संस्कृति हाबी हुँदै गएको सङ्केत गरेको छ ।
पछिल्लो अध्यावधिक: माघ १८, २०८२ १०:१९
