गुगलको जिनी वर्ल्ड मोडेल, अब स्ट्रिट भ्यु प्रयोग गरी वास्तविक सडकहरूको सिमुलेसन गर्न सकिने

 

काठमाडौँ । गुगल डिपमाइन्डले आफ्नो बहुउद्देश्यीय वर्ल्ड मोडेल ‘प्रोजेक्ट जिनी’ (Project Genie) लाई स्ट्रिट भ्युसँग जोड्ने भएको छ । गुगलले आफ्नो गुगल आई/ओ २०२६ डेभलपर कन्फ्रेन्समा महत्त्वपूर्ण घोषणा गरेको हो ।

यसको माध्यमबाट प्रयोगकर्ताहरूले अब वास्तविक सडक र त्यसको वरपरको वातावरणलाई अत्यन्त प्रभावकारी र अन्तरक्रियात्मक रूपमा सिमुलेट गर्न सक्नेछन् । हामीले सामान्यतया गुगल म्याप्समा आफ्नो घर वा कुनै ठाउँ हेर्न स्ट्रिट भ्यु प्रयोग गर्ने गरेका छौँ ।

तर अब जिनीको सहयोगमा ती ठाउँहरूलाई एउटा जीवन्त संसारको रूपमा अनुभव गर्न सकिनेछ । यसमा प्रयोगकर्ताले मौसम परिवर्तन गर्ने वा डे आफ्टर टुमारो (Day After Tomorrow) जस्तो कुनै विशेष परिदृश्यमा कुनै ठाउँ कस्तो देखिन्छ भनेर हेर्न सक्नेछन् ।

उदाहरणका लागि यदि तपाईँ हिउँ नपर्ने समयमा न्यु योर्क जाँदै हुनुहुन्छ भने त्यहाँको कुनै ब्लक हिउँ परेको बेला कस्तो देखिन्छ भनेर सिमुलेसन गरेर हेर्न सकिनेछ ।

गुगलसँग विगत २० वर्षदेखि सङ्कलित ११ देशका २८० अर्बभन्दा बढी स्ट्रिट भ्यु तस्बिरहरू छ न्। डिपमाइन्डका अनुसन्धान वैज्ञानिक ज्याक पार्कर-होल्डरका अनुसार यति ठुलो परिमाणको वास्तविक विश्वको तथ्याङ्क र सिमुलेसन गर्ने क्षमतालाई जोड्नु अत्यन्त शक्तिशाली कुरा हो ।

जिनीको मुख्य लक्ष्य शिक्षा, गेमिङ र रोबोटिक्स तालिममा सहयोग पुर्‍याउनु हो । यसलाई लन्डन जस्तो ठाउँ, जहाँ बिरलै घाम लाग्छ, त्यहाँ खटिने रोबोटहरूलाई घामको किरणका कारण हुन सक्ने अवरोधहरूका लागि सिमुलेसन मार्फत पहिले नै तालिम दिन सकिन्छ ।

त्यस्तै गुगलको स्वचालित सवारी साधन वेमो (Waymo) ले जिनी ३ को प्रयोग गरी आफ्ना कारहरूलाई टोर्नाडो वा अचानक हात्ती भेटिने जस्ता अत्यन्त दुर्लभ घटनाहरूमा कसरी प्रतिक्रिया दिने भनेर तालिम दिइरहेको छ । स्ट्रिट भ्युले रोबोट वा मानिसको दृष्टिकोणबाट संसारलाई सिमुलेट गर्न अनुमति दिन्छ ।

हाल यो प्रविधि विकासको क्रममै छ । गुगल डिपमाइन्डका प्रोडक्ट म्यानेजर डिएगो रिभसले यो अझै पनि एउटा प्रयोग मात्र भएको र यसको शुद्धतामा सुधार गर्न धेरै बाँकी रहेको बताएका छन् ।

अहिलेको सिमुलेसनमा केही कमी कमजोरी समेत देखिएका छन् । यो पूर्ण रूपमा यथार्थपरक (photorealistic) नभई भिडिओ गेमको गुणस्तरको मात्र छ । यो मोडेल अझै भौतिक नियमहरू प्रति सचेत छैन ।

उदाहरणका लागि एउटा सिमुलेसनमा हिउँमा दौडिरहेकी महिला क्याक्टस र झाडीहरूबाट सिधै पार भएको देखिएको थियो । यद्यपि, अनुसन्धानकर्ताहरूका अनुसार यस्ता मोडेलहरूले समयसँगै अवलोकनका आधारमा भौतिक नियमहरू सिक्नेछन् ।

यसमा 'स्थानिक निरन्तरता' (spatial continuity) को सफलता मिलेको छ । यदि प्रयोगकर्ता ३६० डिग्री घुम्छन् भने एआईले पछाडिको वातावरण सहि रूपमा सम्झन्छ र त्यसमा नयाँ वातावरण निर्माण गर्न सक्छ ।

गुगलले अमेरिकामा रहेका केही गुगल एआई अल्ट्रा प्रयोगकर्ताहरूका लागि जिनीमा गुगल स्ट्रिटको सुविधा उपलब्ध गराउन थालिसकेको छ । आगामी केही हप्ताहरूमा विश्वभरका अल्ट्रा प्रयोगकर्ताहरूले पनि यसमा पहुँच पाउनेछन् ।

पछिल्लो अध्यावधिक: जेठ १०, २०८३ ७:४३

टिप्पणीहरू