तोडियो च्याटजीपीटीको रेकर्डः शब्दकै भरमा भिडिओ बनाउने ओपनएआईको सोरा एप ५ दिनमै १० लाख पटक डाउनलोड, छ्यापछ्याप्ती एआई भिडिओ
असोज २५, २०८२ ११:३०
काठमाडौँ । शब्दकै भरमा भिडिओ बनाइदिने ओपन एआईको ‘सोरा’ले सार्वजनिक भएको पाँच दिनभित्रै १० लाखभन्दा बढी डाउनलोड भएर कीर्तिमान कायम गरेको छ । यो आँकडा कम्पनीकै चर्चित च्याटबट च्याटजीपीटीले सुरुवाति दिनमा बनाएको कीर्तिमानभन्दा पनि छिटो हो ।
आकर्षक र वास्तविक लाग्ने किसिमका भिडिओ बनाउने यो एप विभिन्न कारणले चर्चा र विवादमा तानिएको छ । खासगरी प्रतिलिपि अधिकार (कपीराइट) र मृत सार्वजनिक व्यक्तित्वको तस्बिरको प्रयोगका कारण यसको आलोचना भइरहेको छ ।
अमेरिकाको एप्पल एप स्टोरमा शीर्ष स्थानमा पुगेको यो एपले शब्दकै भरमा १० सेकेन्ड लामा यथार्थपरक देखिने भिडिओ बनाउँछ । सोराका प्रमुख बिल पिबल्सले सामाजिक सञ्जाल एक्समा एक पोस्टमार्फत ५ दिनमै सोराको डाउनलोड १० लाख नाघेको जानकारी दिएका हुन् ।
sora hit 1M app downloads in <5 days, even faster than chatgpt did (despite the invite flow and only targeting north america!)!
— Bill Peebles (@billpeeb) October 9, 2025
team working hard to keep up with surging growth. more features and fixes to overmoderation on the way!
उनका अनुसार हाल यो एप उत्तरी अमेरिकामा ‘इन्भिटेसन’ पाएका प्रयोगकर्ताका लागि मात्र उपलब्ध छ । सीमित क्षेत्रका त्यो पनि सीमित प्रयोगकर्ता माझ उपलब्ध भएकाले यसको कीर्तिमानी डाउनलोड सङ्ख्या आश्चर्यजनक छ ।
च्याटजीपीटी सार्वजनिक भएको सुरुको हप्ता अमेरिकामा मात्रै उपलब्ध गराइएको थियो । जब कि सोरा भने हाल अमेरिका र क्यानडामा अफर गरिएको छ ।
एपफिगरको तथ्याङ्कले क्यानडामा ४५ हजार मात्रै इन्स्टल भएको देखाएको छ । यसरी अमेरिकाकै आईओएस एप स्टोरलाई आधार मान्दा पनि सोराको डाउनलोड च्याटजीपीटीभन्दा प्रभावशाली छ ।
यस सफलताका बीच सोराले प्रतिलिपि अधिकार र मृत सार्वजनिक व्यक्तित्वको तस्बिर व्यवस्थापनमा देखाएको कमजोरीले अनलाइनमा चर्को आलोचना खेपिरहेको छ । प्रयोगकर्ताले एपबाट बनाएका भिडिओ सामाजिक सञ्जालमा सजिलै पोस्ट गर्न सक्ने भएकाले सामाजिक सञ्जाल फिड यस्ता भिडिओले भरिएका छन् ।
दिवङ्गत वैज्ञानिकद्वय अलबर्ट आइन्स्टाइन र स्टफिन हकिङको झगडा परेको देखिने एआई भिडिओ पनि उत्तिकै भाइरल भइरहेको छ । केही भिडिओमा माइकल ज्याक्सन र टुपाक शकुर जस्ता दिवङ्गत सङ्गीतकारलाई देखाइएको छ ।
सन् २०१४ मा निधन भएका चर्चित अमेरिकी अभिनेता तथा हास्यकलाकार रोबिन विलियम्सकी छोरी जेल्डा विलियम्सले तीन दिनअघि मानिसहरूलाई आफ्नो बुबाको एआई-सिर्जित भिडिओ पठाउन बन्द गर्न आग्रह गरेकी थिइन् । यस विषयमा ओपनएआईका एक प्रवक्ताले अमेरिकी समाचार साइट एक्सियोसलाई ईमेलमार्फत ऐतिहासिक व्यक्तित्वको चित्रणलाई अनुमति दिनुमा ‘वाक स्वतन्त्रताको बलियो चासो’ रहेको बताएका छन् ।
तर, प्रवक्ताका अनुसार ‘हालै निधन भएका’ सार्वजनिक व्यक्तित्वका लागि आधिकारिक व्यक्तिले उनीहरूको तस्विर प्रयोग नगर्न अनुरोध गर्न सक्नेछन् । यद्यपि कम्पनीले ‘हालै’ भन्नाले कति समयलाई जनाउँछ भन्ने स्पष्ट पारेको छैन ।
पछिल्लो अध्यावधिक: असोज २५, २०८२ ११:३०
