डोनल्ड ट्रम्पको जस्तो कपाल भएकै कारण बलिबाट अन्तिम समयमा बचाइयो बङ्गलादेशको भाइरल भैँसी

काठमाडौँ । इन्टरनेटमा भाइरल भएको एउटा दुर्लभ अल्बिनो (सेतो) भैँसीलाई बङ्गलादेशमा यस वर्षको बकरिद (इद उल-अजहा) को बलिबाट अन्तिम समयमा बचाइएको छ । अमेरिकी राष्ट्रपति डोनल्ड ट्रम्पको जस्तै सुनौलो र लामो कपाल भएका कारण ‘डोनल्ड ट्रम्प’ उपनाम दिइएको उक्त भैँसीलाई सरकारी हस्तक्षेपपछि सुरक्षित गरिएको हो ।

करिब ७०० किलोग्राम तौल भएको यो ४ वर्षीय भैँसीलाई इदको बलिका लागि विक्री गरिएको थियो । तर सामाजिक सञ्जाल र इन्टरनेटमा यसका भिडिओ निकै भाइरल भएपछि भैँसीलाई हेर्न र तस्विर खिच्न मानिसहरूको ठुलो भीड जम्मा भयो । अत्यधिक जनचासो र सुरक्षा चुनौतीलाई मध्यनजर गर्दै बङ्गलादेशका गृहमन्त्री सलाहुद्दीन अहमदको निर्देशनमा बलि रोक्ने निर्णय लिइयो र खरिदकर्ताको पैसा फिर्ता गरियो ।

पशुपालन विभागले यो जनावर अत्यन्तै दुर्लभ र कलिलो भएकाले यसलाई अझै केही वर्ष पाल्न सकिने भन्दै सरकारलाई अनुरोध गरेको थियो । केरनीगञ्ज प्रहरी स्टेसनका अधिकारीका अनुसार सरकारको निर्देशनपछि यसलाई उद्धार गरिएको हो । हाल उक्त भैँसीलाई ढाकास्थित राष्ट्रिय चिडियाखानामा सारिएको छ । चिडियाखानाका क्युरेटर अतिकुर रहमानका अनुसार भैँसीका लागि छुट्टै गोठ र विशेष हेरालुको व्यवस्था गरिएको छ र यसलाई दुई हप्तासम्म क्वारेन्टाइनमा राखिनेछ ।

भैँसीका मालिक जियाउद्दिन मृधाका अनुसार उनको भाइले भैँसीको कपाल अमेरिकी राष्ट्रपति ट्रम्पको जस्तो देखेपछि ठट्टा गर्दै यसको नाम ‘ट्रम्प’ राखेका थिए । यो भैँसी निकै शान्त र ज्ञानी स्वभावको भएको तर यसलाई बारम्बार खाना खुवाउनुपर्ने, नियमित नुहाइदिनुपर्ने र घामबाट बचाउनुपर्ने जस्ता विशेष हेरचाहको आवश्यकता पर्ने मृधाले बताएका छन् । अल्बिनो जातको भैँसी चिडियाखाना वा उचित स्याहारमा २० वर्षसम्म बाँच्न सक्छ । तर यस्ता भैँसी घामप्रति निकै संवेदनशील हुन्छन् ।

बङ्गलादेशमा धेरैजसो गाई-भैँसी कालो वा गाढा रङका हुने भएकाले यो सेतो भैँसी इदको पशु बजारमा सबैको आकर्षणको केन्द्र बनेको थियो । यो वर्ष बङ्गलादेशमा मात्रै १ करोड २० लाखभन्दा बढी जनावरहरूको बलि दिइने अनुमान छ । यद्यपि, इन्टरनेटमा भाइरल भएको यसको रूप, उपनाम र त्यसले सिर्जना गरेको चर्चाले अन्ततः यो दुर्लभ भैँसीको ज्यान बचाउन सफल भएको छ ।

 

पछिल्लो अध्यावधिक: जेठ १४, २०८३ १४:१०

टिप्पणीहरू