२०७९, ३१ श्रावण मंगलबार   |  
Tuesday 16th August 2022

आफुखुसी इन्टरनेटको तार काट्नेलाई कारबाही गर्ने प्राधिकरणको चेतावनी

नेपाल दुरसञ्चार प्राधिकरणले काठमाडौं महानगरपालिकाको ठमेल लगायतका क्षेत्रमा दूरसञ्चार सेवा प्रदायकका (इन्टरनेट सेवा प्रदायक लगायतका) तार काटिएको विषयमा आपत्ति जनाएको छ ।

गत आइतबारदेखि नेपालकै मूख्य पर्यटकीय क्षेत्र ठमेलको इन्टरनेट सेवा प्रभावित भएको छ । ठमेल पर्यटन विकास समितिले पूर्व जानकारी बिना तार काट्दा नेपाल टेलिकम, वर्ल्डलिंक, भायनेट लगायतका मूख्य इन्टरनेट सेवा प्रदायकले दिइरहेको सेवा अवरुद्ध हुन पुगेको थियो ।

इन्टरनेट सेवा अवरुद्ध हुँदा ठमेल क्षेत्रका डेडिकेटेड इन्टरनेट जडान गरेका कर्पोरेट ग्राहकदेखि होटेल, रेस्टुरेन्ट लगायतका सबै व्यवसाय र स्थानीयका घर सबैतिरको इन्टरनेट सेवा प्रभावित भएको थियो ।

तार हटाउने विषयमा दूरसञ्चार क्षेत्रको नियामक नेपाल दूरसञ्चार प्राधिकरण र सेवा प्रदाय कसैसँग पनि समन्वय नभएको पाइएको छ ।

बिना समन्वय तार काटिएको विषयलाई लिएर प्राधिकरणले शुक्रबार आफ्ना धारण सार्वजनिक गरेको छ । प्राधिकरणले अव्यवस्थित तारहरु व्यवस्थित गर्ने प्रकृया अगाडि बढेको र सेवा प्रदायक संस्थाहरु समेत तार व्यवस्थापन गर्न तत्पर हुँदाहुँदै यसरी तार काटिनु कानुन विपरीत भएको उल्लेख गरेको छ ।

त्यसरी तार काटिदा अत्यावश्यक सेवाको रुपमा रहेको दूरसञ्चार सेवा अवरुद्ध भएको, व्यापार व्यवसायमा प्रत्यक्ष असर परेको तथा नागरिकको सञ्चार तथा सूचना पाउने हक हनन हुन गएको प्राधिकरणको ठहर छ ।

‘दूरसञ्चार जस्तो अत्यावश्यक सेवा अवरुद्ध हुने गरी गरिएको यस्तो कार्य दूरसञ्चार ऐन, २०५३ को मर्म विपरीत र दण्डनीय छ’, प्राधिकरणले भनेको छ, ‘सम्बन्धित मन्त्रालय, नियामक र सरोकारवाला सेवाप्रदायक संस्थाहरुसँग समन्वय नगरी इन्टरनेटका तार काट्दा सेवाग्राही तथा आम नागरिक दूरसञ्चार सेवाबाट बञ्चित भएका छन् ।’

यसमा प्रयोग हुने तार र यन्त्र उपकरण नेपालभित्र निर्माण नहुने हुँदा सेवा सुचारु गर्दा थप आर्थिक व्ययभार समेत पर्ने भएकोले यस्तो कार्य कुनै पनि दृष्टिकोणबाट उचित नदेखिएको प्राधिकरणको भनाई छ ।

त्यसैल आगमी दिनमा यस्ता कार्य गर्न र नगराउन समेत प्राधिकरणले सचेत समेत गराएकाे छ ।

Logo
© 2019, All Rights Reserved with TechPana Media Pvt. Ltd.

टेकपाना मिडिया प्रा‍‍. लि.

अनामनगर, काठमाडौ
Email:  [email protected]
Web: techpana.com
फोनः  +977-01-5244861
सूचना विभाग दर्ता नं.  १५४१/७६-७७

सम्पादकः गोपाल साउद

विज्ञापनका लागि:
[email protected]
मोबाइलः ९८५१०४४४५८

Contact us | Our Team