भारतमा सुरु भयो फेसबुक पे, ह्वाट्सएपबाटै भुक्तानी गर्न सकिने

काठमाडौं । फेसबुकले डिलिटल भुक्तानी गेटवेको रुपमा भारतमा फेसबुक पे सुरु गरेको छ । यससँगै भारतीय ह्वाट्सएप प्रयोगकर्ताले ह्वाट्सएपबाटै भुक्तानी गर्न सक्ने भएका छन् ।

यसअघि फेसबुकले यो सेवा पहिलो पटक ब्राजिलमा सुरु गरेको थियो । तर, ब्राजिलको केन्द्रीय बैंकले भने यसरी ह्वाट्सएपले भुक्तानी सेवा सुरु गर्दा बजार बिग्रिने भन्दै सेवा बन्द गरिदिएको थियो ।

फेसबुकले समय समयमा उक्त सेवा सुचारु गर्न आग्रह गर्दै आएको भएतापनि अझै ब्राजिलमा उक्त सेवा पुनः सुचारु हुन सकेको छैन । यसैबीच फेसबुकले विश्वको दोस्रो ठूलो इन्टरनेट बजार रहेको भारतमा उक्त सेवा सुरु गरेको हो ।

यससँगै भारतमा ह्वाट्सएप ‘सुपर एप’ हुने भएको छ । भारतमा म्यासेजिङको लागि सबैभन्दा बढी प्रयोग हुने एपको रुपमा रहेको ह्वाट्सएपमा पेमेन्ट सर्भिस समेत इन्ट्रिगेट भएसँगै यो एपलाई सुपर एपको रुपमा हेरिएको छ ।

भारतीय ह्वाट्सएप प्रयोगकर्ताले त्यसैबाट आफ्ना आफन्तलाई पैसा पठाउनुका साथै विभिन्न सामान खरिद गरेको पैसा तिर्न सक्नेछन् । ह्वाट्सएपबाट साना व्यवसायलाई सहयोग गर्ने उद्देश्यका साथ फेसबुकले भुक्तानी प्रणाली सञ्चालनमा ल्याइएको जनाएको छ ।

अब ह्वाट्सएप मार्फत फोटो तथा भिडियो शेयर गरे झैं पैसा पनि आदान-प्रदान गर्न सकिनेछ ।

पछिल्लो अध्यावधिक: असोज २, २०७९ २२:३०

टिप्पणीहरू