जेमिनाई एआई प्रयोग गरी गुगल स्लाइड्समा केही मिनेटमै यसरी बनाउनुहोस् चाहेजस्तो प्रिजेन्टेसन

काठमाडौँ । प्रिजेन्टेसन वा स्लाइड बनाउन घण्टौँ समय खर्च गर्ने दिन अब अन्त्य भएका छन् । गुगलको आर्टिफिसियल इन्टेलिजेन्स (एआई) जेमिनाईले अब गुगल स्लाइड्ससँग मिलेर केही मिनेटमै व्यावसायिक र आकर्षक प्रिजेन्टेसन तयार पारिदिने सुविधा ल्याएको छ ।

तपाईँ विद्यार्थी, शिक्षक वा कार्यालयको कर्मचारी जे भए पनि यो नयाँ प्रविधिको प्रयोग गरी सजिलै स्लाइड प्रिजेन्टेसन बनाउन सक्नु हुनेछ । यहाँ हामी तपाईँलाई त्यसको तरिका बारे बताउँदै छौँ ।

प्रिजेन्टेसन बनाउनका लागि सबैभन्दा पहिला गुगलको जेमिनाई एपमा जानुहोस् र टुल्स सेक्सनबाट क्यानभास (Canvas) छनोट गर्नुहोस् । यहाँ तपाईँले जेमिनाईलाई के विषयमा प्रिजेन्टेसन चाहिएको हो, त्यसको प्रम्ट (विवरण) दिनुपर्ने हुन्छ । उदाहरणका लागि: 'नेपालको पर्यटन व्यवसायका बारेमा ६ वटा स्लाइडको प्रिजेन्टेसन बनाऊ' भनी निर्देशन दिन सक्नुहुन्छ ।

यदि तपाईँसँग पहिले नै कुनै रिपोर्ट वा डकुमेन्ट छ र त्यसकै आधारमा स्लाइड बनाउन चाहनुहुन्छ भने जेमिनाईमा @ चिन्ह टाइप गरी आफ्नो ड्राइभमा भएको फाइलको नाम लेख्नुहोस् । जेमिनाईले उक्त डकुमेन्ट पढेर त्यसका मुख्य बुँदाहरू समेटेर स्वचालित रूपमा स्लाइड तयार पारिदिन्छ ।

जेमिनाई क्यानभासले स्लाइड तयार पारेपछि तपाईँले त्यसलाई गुगल स्लाइड्स (Google Slides) मा एक्सपोर्ट (Export) गर्न सक्नुहुन्छ । स्लाइड्स खुलेपछि अक्षर, तस्विर, डिजाइन आदि सम्पादन गर्न सक्नु हुन्छ । दायाँतर्फ रहेको Ask Gemini प्यानल प्रयोग गरेर तपाईँले प्रत्येक स्लाइडको बनावट परिवर्तन गर्ने, लेखिएको भाषालाई सरल बनाउने वा थप बुँदाहरू थप्ने काम गर्न सक्नुहुन्छ ।

यसबाट प्रिजेन्टेसन बनाउनका लागि तपाईँले इन्टरनेटमा फोटो खोजिरहनु पर्दैन । जेमिनाईलाई 'पहाडमा सूर्योदय भएको बेला चिया खाइरहेको फोटो बनाऊ' भनी निर्देशन दिएमा त्यसले तत्कालै नयाँ र सान्दर्भिक चित्रहरू बनाइदिन्छ । साथै, डेटा वा तथ्याङ्क देखाउनका लागि Insert > Help me visualize > Infographic विकल्प प्रयोग गरी आकर्षक चार्टहरू पनि बनाउन सकिन्छ ।

यद्यपि केही फिचरहरू भने प्रिमियम भर्सनमा सीमित गरिएका छन् । तर पनि चिन्ता नलिनुहोस् । स्लाइड एपमा गइसकेपछि त्यहाँ तपाईँले दायाँ तर्फ टेम्पेल, बिल्डिङ ब्लक, गुगल इमेजेजका स्टक तथा वेब तस्विर, ड्राइभ तथा गुगल फोटोज जस्ता विकल्प पनि प्रयोग गर्न सक्नु हुन्छ ।

राम्रो तथा प्रभावकारी प्रिजेन्टेसनका लागि जेमिनाईलाई क्यानभासको च्याटमा गएर कति वटा स्लाइड चाहिने, कस्तो दर्शकका लागि हो र कुन भाषा-शैली प्रयोग गर्ने भन्ने जस्ता कुराहरू प्रम्टमा स्पष्ट खुलाउनुहोस् ।

प्रिजेन्टेसन दिने बेला के बोल्ने भन्ने कुरा पनि जेमिनाईले नै लेखिदिन सक्छ । एआईले कहिलेकाहीँ गलत तथ्यहरू दिन सक्ने सम्भावना पनि रहन्छ । त्यसैले अन्तिम रूप दिनुअघि एक पटक आफैँले विवरणहरू रुजु गर्न नभुल्नुहोस् ।

पछिल्लो अध्यावधिक: पुस १९, २०८२ ९:५४

टिप्पणीहरू