यो साता नेपाली बजारमा आउँदैछन् सामसङका यी महँगा फोन
माघ १६, २०७९ १५:७
काठमाडौं । नेपाली बजारमा सामसङका नयाँ स्मार्टफोन माेडेलहरू भित्रिने भएका छन् । कम्पनीले यही साता फ्ल्यागशिप स्मार्टफोनहरू भित्र्याउन लागेकाे हाे ।
यसअन्तर्गत सामसङ ग्यालेक्सी ए७३, सामसङ ग्यालेक्सी एस२२ सिरिज, सामसङ ग्यालेक्सी जेड फोल्ड फोर र सामसङ ग्यालेक्सी जेड फ्लिप फोर रहेका छन् ।
सामसङ नेपालका निर्देशक प्रणयरत्न स्थापितले कम्पनीका उत्कृष्ट स्मार्टफोन नेपाली बजारमा पुनः भित्र्याउन पाउँदा उत्साहित भएकाे बताए । "नेपाली बजारमा नयाँ इनोभेसनका यी अमेजिङ फोनहरू ल्याउन पाउँदा खुसी छौँ ," उनले भनेका छन् ।
यसअघि सरकारले महँगा फोनको आयातमा रोक लगाउँदा सामसङका यी फोन नेपाली बजारमा भित्रिन सकेका थिएनन् ।
ग्यालेक्सी एस७३
कम्पनीले नेपाल भित्र्याउन लागेको सामसङ ग्यालेक्सी ए७३ फाइभजी फोन ८ जीबी र्याम २५६ जीबी इन्टर्नल स्टोरेज भेरियन्टमा उपलब्ध हुनेछ । सुपर एमोलेड प्लस डिस्प्ले भएको फोन एन्ड्रोइड १३ मा आधारित छ भने वनयूआई फाइभद्वारा सञ्चालित छ ।
यस मोडेलमा क्वालकमको एसएम ७३२५ स्न्यापड्रागन ७७८जी (Qualcomm SM7325 Snapdragon 778G 5G (6 nm) चिपसेट प्रयोग गरिएको छ ।
१०८ मेगापिक्सेलको मुख्य क्यामेरा, १२ मेगापिक्सेलको अल्ट्रावाइड क्यामेरा, ५ मेगापिक्सेलको म्याक्रो र ५ मेगपिक्सेलको डेप्थ सेन्सर रहेको फोनमा ३२ मेगापिक्सेलको सेल्फी क्यामेरा छ ।
"यस मोडेलमा भएको प्राइमरी सेन्सरले १० गुणा जुम र डेप्थ सेन्सरजस्ता सुविधासहित राम्रोसँग उज्यालो वा अँध्यारो कोठमा राम्रा फोटोहरू खिच्न सकिन्छ," कम्पनीले भनेको छ ।
त्यस्तै ५००० एमएएच ब्याट्री क्षमता भएको फोनमा २५ वाटको चार्जर पाउन सकिन्छ । नेपाली बजारमा यो फोन ७५ हजार ९९९ रुपैयाँमा उपलब्ध हुने अनुमान गरिएकाे छ ।
ग्यालेक्सी एस२२
त्यस्तै कम्पनीले ल्याउन लागेको अर्को सिरिज हो, ग्यालेक्सी एस२२ । सामसङका अनुसार यो सिरिज अल्ट्रा र बेस मोडेलमा उपलब्ध हुनेछ ।
६.१ ईन्च डाइनामिक एमोलेड डिस्प्ले रहेको बेस मोडेल र ६.८ इन्च डिस्प्ले रहेको अल्ट्रा मोडेलमा क्वालकमको एसएम ८४५० स्न्यापड्रागन ८ जेन वान (SM8450 Snapdragon 8 Gen 1) चिपसेट प्रयोग गरिएको छ ।
बेस मोडेलमा ५० मेगापिक्सेलको मुख्य क्यामेरा, १० मेगापिक्सेलको टेलिफोटो र १२ मेगापिक्सेलको अल्ट्रावाइड सेन्सर तथा १० मेगापिक्सेलको सेल्फी क्यामेरा दिइएको छ ।
एस२२ अल्ट्रा मोडेलमा १०८ मेगापिक्सेलको मुख्य क्यामेरा, १० मेगापिक्सेलको टेलिफोटो र १२ मेगापिक्सेलको अल्ट्रावाइड सेन्सर तथा १० मेगापिक्सेलको सेल्फी क्यामेरा दिइएको छ । यी दुबै मोडलमा नाइटोग्राफी मोड रहेको कम्पनीले जनाएको छ ।
यस्तै क्यामेराको सुपर–जुम सुविधाले ग्यालेक्सी एस२२ अल्ट्राबाट चन्द्रमाको सतह हेर्न सकिने कम्पनीले दाबी गरेको छ । अल्ट्रा र बेस मोडेलमा नेपाल आउन लागेको बताइए पनि र्याम तथा स्टोरेज भेरियन्टबारे कम्पनीले केही खुलाएको छैन ।
सामसङ ग्यालेक्सी जेड फोल्ड फोर
यसैगरी कम्पनीले भित्र्याउन लागेको अर्को फ्ल्यागशिप फोन हो, सामसङ ग्यालेक्सी जेड फोल्ड फोर । यो फोल्डेबल फोन अन्तर्राष्ट्रिय बजारमा गत अगस्टमा सार्वजनिक भएको थियो ।
७.६ ईन्चको मुख्य डिस्प्ले भएको फोनमा फोल्डेबल डाइनामिक एमोलेड डिस्प्ले प्रयोग गरिएको छ । क्वालकम एसएम८४७५ स्न्यापड्रागन ८ प्लस जेन चिपसेटमा आधारित फोन वनयूआई फाइभमा चल्नेछ ।
यो फाेनका लागि पनि कम्पनीले र्याम भेरियन्ट र मूल्य खुलाएको छैन ।
५० मेगापिक्सेलको मुख्य क्यामेरा, १० मेगापिक्सेलको टेलिफोटो र १२ मेगापिक्सेलको अल्ट्रावाइड क्यामेरा रहेको फोनमा १० मेगापिक्सेल र ४ मेगापिक्सेलका दुई ओटा सेल्फी क्यामेरा समावेश छ ।
४४०० एमएएच ब्याट्री क्षमता भएको फोनमा २५ वाटको चार्जर उपलब्ध गराइएको छ, जसले आधा घण्टामै फोन फुल चार्ज गर्ने कम्पनीको दाबी छ ।
त्यस्तै यो फोनले १५ वाटको वायरलेस चार्जर र ४.५ वाटको रिभर्स वायरलेस चार्जर सपोर्ट गर्ने बताइएको छ ।
सामसङ ग्यालेक्सी जेड फ्लिप फोर
र, कम्पनीले नेपाल भित्र्याउन लागेको अर्को फ्ल्यागशिप फोन हो, सामसङ ग्यालेक्सी जेड फ्लिप फोर । ६.७ ईन्च फोल्डेबल डाइनामिक एमोलेड डिस्प्ले भएको यो फोनको सुरक्षाका लागि सुपर एमोलेड गोरिल्ला ग्लास उपलब्ध छ ।
क्वालकम एसएम ८४७५ स्न्यापड्रागन ८ प्लस जेन चिपसेटद्वारा सञ्चालित फोन एन्ड्रोइड १२ र वन यूआई फाइभमा आधारित छ । १२ मेगापिक्सेलको वाइड सेन्सर र १२ मेगापिक्सेलको अल्ट्रावाइड सेन्सर रहेको यो फोनमा १० मेगापिक्सेलको सेल्फी क्यामेरा समावेश छ ।
फोनमा ३७०० एमएएच क्षमताको ब्याट्री उपलब्ध गराइएको छ, जसलाई चार्ज गर्न कम्पनीले २५ वाटको चार्जर उपलब्ध गराउने छ । त्यस्तै यस फोनले १५ वाट वायरलेस र ४.५ वाट रिभर्स वायरलेस चार्जर सपोर्ट गर्नेछ । कम्पनीले यस मोडेलको पनि र्याम भेरियन्ट र मूल्य खुलाएको छैन ।
पछिल्लो अध्यावधिक: माघ १६, २०७९ १५:७
