close

आईफोन १४ मा अनेकौँ समस्या रहेको एप्पलको स्वीकारोक्ति, उचित नहुन सक्छ तत्काल खरिद गर्ने निर्णय

टेकपाना टेकपाना

असोज ९, २०७९

आईफोन १४ मा अनेकौँ समस्या रहेको एप्पलको स्वीकारोक्ति, उचित नहुन सक्छ तत्काल खरिद गर्ने निर्णय

काठमाडौं । सार्वजनिक भएपछि केही प्रयोगकर्ताहरूको हातमा आईफोन फोर्टिन पुगिसकेको छ । तर धेरैजसो प्रयोगकर्ता भने यसको प्रतिक्षामा छन् । यद्यपि सार्वजनिक भए लगत्तै आईफोन फोर्टिनमा देखिएका विभिन्न समस्याका कारण यो फोन खरिद गर्ने कि नगर्ने भन्ने दुविधा धेरै प्रयोगकर्ताहरूलाई परेको छ । फोन सार्वजनिक भएको दुई साता नबित्दै एप्पलले दुई ओटा आकस्मिक अपडेट सार्वजनिक गरिसकेको छ । प्रयोगकर्ताको गुनासो आउने क्रम भने अझैँ रोकिएको छैन ।

एप्पल स्वयम्‌ले पनि फोनमा विभिन्न समस्या देखिको स्वीकार गर्दै आएको छ र त्यसलाई सुधार्ने प्रतिबद्धता पनि जाहेर गर्दै आएको छ । नयाँ आईफोनमा देखिएको पछिल्लो समस्या भनेको ‘कारप्ले फोन कल्स’ र ‘डेटा माइग्रेसन’मा हो । यो विषयलाई एप्पलले पनि बगको रुपमा पुष्टि गरिसकेको छ । 

आईफोन १४ सिरिजका स्मार्टफोनहरूको आवाज कनेक्ट गरिएको गाडीमा निकै कमजोर रहेको गुनासो आएको छ । प्रयोगकर्ताले सामाजिक सञ्जालका विभिन्न माध्यमहरूमा यो गुनासो पोखेका छन् । एप्पलले भने आईओएस १६.०.२ को अपडेटसँगै यी समस्याहरू समाधान गर्ने अनुमान छ । 

यस बाहेक अर्को समस्या भनेको ‘डेटा माइग्रेसन’ हो । आईफोन १४ प्रो म्याक्समा डेटा माइग्रेसनको समस्या देखिएको छ । नयाँ फोनमा डेटा माइग्रेट अर्थात सार्ने बेलामा फोन नै फ्रिज हुने अर्थात नचल्ने समस्या आएको प्रयोगकर्ताको गुनासो छ । सामान्यतया डेटा ट्रान्सफर गर्दा आईक्लाउड रिस्टार्ट गरिन्छ अथवा फोन चलाउँदा सुरुमै फोनबाट डेटा माइग्रेट अप्सन प्रयोग गर्न सकिन्छ । 

यो विषयमा एप्पलले भने फोन पाँच मिनेट वा सो भन्दा लामो समयदेखि नचलेको अवस्थामा फोन रिस्टार्ट गर्न सुझाएको छ । तर यसो गर्दा डेटामा कुनै प्रभाव पर्छ कि पर्दैन भन्ने विषय स्पष्ट छैन ।